Ligje, rregullore
MINISTRIA E TURIZMIT, KULTURËS, RINISË DHE SPORTEVE RREGULLORE e Funksionimit të Agjencisë Kombëtare të Standardizimit të Botimeve të Librit Kjo rregullore hartohet në mbështetje të nenit 24, kreu VIII, me titull “Numri Ndërkombëtar i Standardizuar i Librit (ISBN)”, të Ligjit 9616 datë 27.09.2006 “Për librin në Republikën e Shqipërisë”. I. Qëllimi Qëllimi i kësaj rregulloreje është të përcaktojë rregullat e funksionimit, të drejtat dhe detyrat e Agjencisë Kombëtare të Standardizimit të Botimeve të Librit, si dhe procedurat e ofrimit, dhënies dhe kontrollit të zbatimit të ISBN-së, në përputhje me kushtet e dhënies së ISBN-së, të parashikuara nga Agjencia Ndërkombëtare e ISBN-së. II. Detyrat e Agjencisë Kombëtare të Standardizimit të Botimeve të Librit Agjencia Kombëtare e Standardizimit të Botimeve të Librit funksionon pranë Bibliotekës Kombëtare dhe është strukturë përbërëse e saj. Agjencia Kombëtare e Standardizimit të Botimeve të Librit ka për detyrë: 1. Të drejtojë dhe të administrojë veprimtarinë që lidhet me pajisjen me ISBN të botuesve, që ushtrojnë veprimtarinë e tyre brenda territorit të Republikës së Shqipërisë, për botimet e tyre. 2. Të mbajë marrëdhënie me Agjencinë Ndërkombëtare të ISBN-së dhe të dërgojë pranë kësaj agjencie të gjitha të dhënat e botuesve si dhe identifikuesit e tyre. 3. Të caktojë identifikuesit për çdo botues dhe për çdo botim. 4. Të krijojë, menaxhojë dhe të mbajë regjistrat e ISBN-së, identifikuesit e botuesve, identifikuesit për çdo botim, si dhe bazën e të dhënave të ISBN-së, në përputhje me politikat e vendosura kohë pas kohe nga Agjencia Ndërkombëtare e ISBN-së. 5. Të korrigjojë ISBN-të dhe bazën e të dhënave të ISBN-vë të pasakta, nëse sigurohet prova e kësaj pasaktësie. 6. Të sistemojë dhe të mbajë të dhëna statistikore për operacionet që kanë lidhje me ISBN-në dhe t’i raportojë këto në Agjencinë Ndërkombëtare e ISBN-së sipas kërkesave të saj. 7. Të trajnojë botuesit në njohjen dhe përdorimin e sistemit të ISBN-së në përputhje me specifikimet e manualit të ISBN-së në fuqi 8. Të përfshijë në sistemin e ISBN-së të gjithë botuesit që ushtrojnë veprimtarinë e tyre brenda territorit të Republikës së Shqipërisë. 9. T’u japë ISBN botuesve të licensuar për ushtrimin e veprimtarisë botuese në përputhje me nenin 19 të Ligjit nr. 9616, datë 27.9.2006, “Për Librin në Republikën e Shqipërisë”. III. Detyrat e Agjencisë së ISBN-së për ofrimin e shërbimit të dhënies dhe kontrollit të zbatimit të ISBN-së 1. Të realizojë dhënien e ISBN-së nëpërmjet lidhjes së një Kontrate vjetore ndërmjet Botuesit dhe kësaj Agjencie, sipas kontratës-tip, pjesë integrale e kësaj rregulloreje. 2. T’u ofrojë botuesve për marrjen e ISBN-së për çdo botim formularin-tip bashkëlidhur dhe pjesë integrale e kësaj rregulloreje, në përputhje më nenin 28, të Ligjit nr. 9616, datë 27.9.2006, “Për Librin në republikën e Shqipërisë”. 3. Të ruajë një kopje të formularit-tip, të plotësuar me shkrim nga Botuesi. 4. Të japë ISBN për çdo titull të ri të botuar për herë të parë ose për çdo ribotim të një titulli kur ndryshon viti i botimit, kur në të përfshihen ndryshime në lidhjen e librit, në tekstin ose formatin e shtypjes, me përjashtim të rishtypjeve pa ndryshime në tekst. 5. Në një botim me shumë vëllime të japë një ISBN për tërë botimin dhe ISBN të veçanta për çdo vëllim; të dyja këto ISBN shtypen në libër me inicialin e vëllimit në krah. 6. Nëse një botim përgatitet nga dy botues (pra si një bashkëpunim), atëhere çdo botuesi t’i japë ISBN të veçantë. Të dy këto ISBN vendosen në pjesën e pasme të fletës së titullit me inicialin e shtëpisë botuese në krah. Në këtë rast në mbulesën e pasme të librit do të shtypet vetëm një ISBN me barkodin, e cila përcaktohet nga vetë botuesit me marrëveshje. 7. T’i japë ISBN-në botuesit brenda 24 orëve nga çasti i paraqitjes së kërkesës/formularit-tip duke llogaritur gjithnjë ditët e punueshme 8. Të kontrollojë vendosjen e ISBN-së sipas nenit 27 të Ligjit nr. 9616 datë 27.9.2006 “Për Librin në republikën e Shqipërisë”, kreu VIII “Numri Ndërkombëtar i Standardizuar i Librit (ISBN)”. 9. T’u ofrojë botuesve manualin e përdorimit të ISBN-së. IV. Detyrat dhe kushtet e botuesit për kërkimin, marrjen dhe vendosjen e ISBN-së 1. Të lidhë një kontratë vjetore me Agjencinë Kombëtare të Standardizimit të Botimeve të Librit. 2. Të paraqesë pranë Agjencisë Kombëtare të Standardizimit të Botimeve të Librit një kopje të licensës. 3. Të përmbushë me korrektësi kushtet e kontratës vjetore të nënshkruar mes tij dhe Agjencisë. 4. Të dërgojë pranë Agjencisë Kombëtare të Standardizimit të Botimeve të Librit çdo ndryshim të adresës, numrit të telefonit, faksit dhe çdo ndryshim të personit përgjegjës. 5. Të dërgojë pranë Agjencisë Kombëtare të Standardizimit të Botimeve të Librit një parashikim vjetor të numrit të titujve që do të botojë. 6. Të paraqesë kërkesën për marrjen e ISBN-së për çdo botim sipas formularit-tip të ofruar nga Agjencia. 7. Të marrë nga Agjencia Kombëtare të Standardizimit të Botimeve të Librit identifikuesin e tij si dhe identifikuesin e titullit për çdo botim të tij 8. Të shënojë ISBN-në në libër sipas kërkesës së nenit 27 të Ligjit nr. 9616 “Për Librin në Republikën e Shqipërisë”. Në mbulesën e librit ISBN-ja duhet të jetë e kombinuar me barkodin. Në rastin e botimeve me “këmishë” mbimbulesë, ISBN-ja do të shënohet edhe në mbimbulesë. ISBN-ja duhet të shtypet me shënja numerike të mëdha dhe lehtësisht të lexueshme. 9. Të paguajë pranë Agjencisë Kombëtare të Standardizimit të Botimeve të Librit tarifat që do të miratohen nga organet kompetente, me udhëzim të përbashkët të Ministrit të Turizmit, Kulturës, Rinisë dhe Sporteve dhe Ministrit të Financave. 10. Të mbajë një regjistër për çdo ISBN të caktuar të botimeve të tij. 11. Të njoftojë Agjencinë Kombëtare të Standardizimit të Botimeve të Librit për çdo ISBN të shtypur gabim. 12. Të kërkojë këshilla, shpjegime dhe ndihmë për çdo problem që lind gjatë ushtrimit të veprimtarisë së tij botuese. V. Shqyrtimi i mosmarrëveshjeve ndërmjet Botuesit dhe Agjencisë Në rast mosmarrëveshjesh të Botuesit dhe Agjencisë veprohet sipas procedurave dhe afateve të përcaktuara në nenin 30 të Ligjit nr. 9616 “Për Librin në Republikën e Shqipërisë”. VI. Të fundit Ndryshimet në këtë rregullore propozohen nga Drejtori i Bibliotekës Kombëtare dhe miratohen me Urdhër të Ministrit të Turizmit, Kulturës, Rinisë dhe Sporteve, në përputhje me rekomandimet dhe rregullat e Agjencisë Ndërkombëtare të ISBN-së. |