Ligje, rregullore, dokumente
REZOLUTË
Shkenca e bibliotekave dhe Albanologjia
Më 22 - 23 nëntor 2010 u mbajt edicioni i pestë me temë Shkenca e bibliotekave dhe Albanologjia i Konferencës Kombëtare të Bibliotekonomisë, si institucion kulturor-shkencor i përbashkët Shqipëri-Kosovë.
Konferenca u organizua në mjediset e Bibliotekës Kombëtare të Shqipërisë. Ajo trajtoi gjerësisht dhe me profesionalizëm problematika që lidhen me funksionet dhe detyrat e bibliotekave kombëtare të Shqipërisë dhe të Kosovës në fushën e grumbullimit, përpunimit dhe shërbimit të informacionit albanologjik, si pjesë e rëndësishme e përpjekjeve shkencore për afirmimin e identitetit kombëtar të shqiptarëve, të historisë dhe të kulturës së tyre.
Drejtues dhe specialistë të të dy bibliotekave paraqitën ligjërata dhe kumtesa, në të cilat analizoheshin praktikat, por dhe vizionet e përbashkëta për rolin që luajnë në epokën digjitale bibliotekat kombëtare përkatëse në një fushë të rëndësishme të veprimtarisë së tyre si menaxhimi i burimeve të dijes albanologjike.
Më konkretisht, në konferencë u trajtuan probleme të ndryshme që kanë të bënin me formimin e specialistëve të burimeve albanologjike në të dy bibliotekat tona kombëtare, me funksionet albanologjike të këtyre bibliotekave, zhvillimin e koleksioneve albanologjike në mjedisin digjital, rëndësinë e koleksioneve të hartografisë për albanologjinë, domosdoshmërinë e sistemeve bibliotekare elektronike me burim të hapur, raportet e bibliografisë me albanologjinë në vështrim historiko-analitik, bibliotekat kombëtare dhe komunikimin albanologjik, koleksionet e studimeve albanologjike, format e pasurimit në albanologji, bibliotekat e veçanta dhe botimet albanologjike etj.
Kumtesat e mbajtura u përqendruan në rolin ndërmjetës, por tejet të rëndësishëm, të të dy bibliotekave midis dijeve albanologjike që bartin koleksionet e tyre dhe përdoruesve që i shfrytëzojnë ato, që në këtë rast janë kryesisht lëvrues të shkencave që përbëjnë albanologjinë. Ky pozicion i kahershëm dhe tradicional i bibliotekave kombëtare u trajtua vështruar në kushtet e reja të shoqërisë së informacionit dhe të komunikimit dhe në përputhje me kërkesat specifike të përdoruesve të burimeve albanologjike.
Nisur nga situata konkrete e veprimtarisë në funksion të përpunimit dhe shërbimit të informacionit albanologjik në bibliotekat tona, pjesëmarrësit në konferencë miratojnë rezolutën e mëposhtme:
Biblioteka Kombëtare e Shqipërisë dhe Biblioteka Kombëtare dhe Universitare e Kosovës realizojnë me sukses detyrat funksionale që lidhen me rolin e tyre si ndërmjetëse mes dijes albanologjike dhe informacionit që bartin në koleksionet gjegjëse, nga njëra anë, dhe lexuesit që i përdor ato, nga ana tjetër. Megjithatë, bibliotekat kombëtare të Shqipërisë dhe Kosovës prej kohësh ndiejnë si domosdoshmëri thellimin dhe përmirësimin e veprimtarisë së tyre që ka të bëjë me plotësimin e kësaj detyre themelore, sidomos në kushtet e shoqërisë së informacionit dhe të teknologjive të reja.
Konferenca thekson rëndësinë e një pozicionimi të qartë, të saktë dhe sa më profesional të dy bibliotekave tona në përmbushjen e detyrave dhe funksioneve të tyre albanologjike. Krahas përpjekjeve për integrimin e bibliotekave të Shqipërisë dhe Kosovës në rrjedhat bashkëkohore europiane dhe botërore, bibliotekarët shqiptarë të të dy vendeve duhet të rritin rolin e tyre në mbështetje të zhvillimit të shkencave albanologjike dhe të vlerësojnë maksimalisht informacionin, sidomos atë elektronik, për veprat albanologjike që ruajnë në fondet e tyre.
Më tepër se deri më sot bibliotekat tona duhet të vlerësojnë teknologjitë e informacionit duke i konsideruar ato si mjete të rëndësishme për rritjen e efektivitetit të shërbimeve ndaj përdoruesve, përfshirë edhe shkencëtarët dhe studiuesit albanologë. Sistemet e integruara bibliotekare të të dy bibliotekave mundësojnë bashkëpunim të frytshëm mes tyre, sidomos në dhënien dhe marrjen e informacionit bibliografik të karakterit albanologjik, ndaj, në kuadër të bashkëpunimit në veprimtarinë informuese bibliografike dhe të krijimit të bazave të të dhënave, konferenca e sheh të udhës krijimin e një portali të përbashkët Shqipëri – Kosovë që do të ofronte informacion albanologjik apo objekte të digjituara, çfarë do të krijonte më shumë mundësi për shkëmbimin e informacionit dhe përdorim të përbashkët të burimeve. U theksua që për realizimin e kësaj ideje është e domosdoshme mbështetja e organeve vendimmarrëse në të dy vendet.
Konferenca ka besim se Biblioteka Kombëtare e Shqipërisë dhe Biblioteka Kombëtare dhe Universitare e Kosovës si edhe bibliotekat e tjera në të dy vendet që shërbejnë literaturë albanologjike do të ngrenë në një nivel më të lartë angazhimin për plotësimin si duhet të detyrave në një fushë të rëndësishme si ajo e shërbimeve albanologjike duke përmbushur kështu misionin e tyre të rëndësishëm kombëtar dhe kulturor.
Tiranë, më 23 nëntor 2010