Ngjarje

“Java e leximit”, në Ditën Ndërkombëtare të Librit për Fëmijë

3-6 Prill 2018



Në Bibliotekën Kombëtare të Shqipërisë, në kuadër të Ditës Ndërkombëtare të Librit për Fëmijë, u çel të martën më datë 3 Prill “Javën e Leximit”, me një atmosferë ilustruese nga bota e përrallave e librit, dhe me personazhet letrarë më të njohur e të dashur për fëmijë. Prej vitit 1967, 2 prilli, ditëlindja e një prej shkrimtarëve më të dashur për fëmijë, Hans Christian Andersen, është shpallur si ditë e veçantë e nxitjes dhe inicimit të dashurisë së leximit te lexuesit e vegjël. Duke iu përgjigjur interesimit gjithnjë e më të madh të fëmijëve për aktivitete të tilla, si dhe duke iu përshtatur kalendarit shkollor në vend, Biblioteka Kombëtare e Shqipërisë e hapi javën e saj të letërsisë fëminore me lexime të ndryshme të përzgjedhura nga vepra e Andersenit si dhe e shumë autorëve të tjerë të letërsisë fëminore. Kjo javë promovuese synon nxitjen dhe edukimin e procesit të leximit te fëmijët, si pjesë e veprimtarive të ngjashme dhe shumë të suksesshme që po zhvillohen në sallat e ndryshme të leximit në Bibliotekën Kombëtare. Përmes stafit të BKSH-së, sipas një kalendari të përcaktuar, u zhvilluan seanca leximi nga letërsi e përzgjedhur për fëmijë, përshtatur për grup-moshat 7-12 vjeç. Ky program u zhvillua nga data 3 deri më 6 Prill 2018. Nxënës të shkollave 9-vjeçare të kryeqytetit si “Lasgush Poradeci”, “Mihal Grameno”, “Turgut Ozal” dhe “Fan Noli” përmes kënaqësisë që të dhuron leximi, u përfshinë në botën magjike të përrallave me zana dhe princesha apo udhëtimeve në hapësirë; zbuluan së bashku botën e mahnitshme nënujore përmes “Udhëtimi nën det” të shkrimtarit amerikan për fëmijë Raymond A. Montgomery, duke u bërë protagonistë të aventurës së tyre, por edhe të zbulonin gjenezën e shpikjeve gjeniale të njerëzimit përmes librit ”Çfarë zbulimi: histori idesh të rrufeshme” të autores italiane Irene Venturi.

Në Bibliotekën Kombëtare të Shqipërisë takimet me miqtë e vegjël të librit janë kthyer në një traditë të bukur dhe do të vijojnë edhe në të ardhmen me veprimtari të tjera të ngjashme.