Ngjarje

Seminar mbi psikanalizën frojdiane në Bibliotekën Kombëtare

11-12 Maj 2018



Në Bibliotekën Kombëtare të Shqipërisë, në bashkëpunim me Rrethin Lakanian Shqiptar, u zhvillua ditën e premten dhe të shtunë seminari 2-ditor me temë “Transferenca nga Frojdi te Lacan-i në klinikën me fëmijën dhe adoleshentin”, me pjesëmarrjen e veçantë të psikanalistes Myriam Mitelman, lektore e Fushës frojdiane dhe anëtare e Shoqatës Botërore të Psikanalizës, si dhe psikanalistë, psikologë dhe studentë.

Gjatë punimeve të këtij seminari u projektua filmi “Në qiell të hapur” realizuar në Qendrën rezidenciale ‘Courtil’ që ndodhet në kufirin franko-belg, me regji të Mariana Otero-s. Ky film solli një dëshmi të mirëfilltë të jetës së fëmijëve dhe adoleshentëve të kësaj qendre, të cilët vuajnë nga çrregullime mendore dhe sociale, duke përcjellë një mesazh të qartë. Ditë pas dite të rriturit përpiqen të kuptojnë enigmën që secili prej tyre përfaqëson pa iu imponuar atyre asgjë. Ata shpikin zgjidhje të cilat ndihmojnë fëmijët rast pas rasti të gjejnë qetësinë e munguar. Nëpërmjet historive të tyre “Në qiell të hapur” u jep zë dhe zbulon vizionin e tyre për botën. Pas shfaqjes së filmit seminari vijoi me tryezën e rrumbullakët e drejtuar nga Dr. Eriola Noçka dhe Dr. Elida Fejzo duke u përqendruar dhe diskutuar rreth temave: “Vështirësi të ndërhyrjeve stomatologjike tek fëmijët autikë” dhe “‘Vëmb’ puna me një fëmijë autik 10 vjeçar”. Një vëmendjen të veçantë iu kushtua edhe çështjeve të praktikës institucionale në Francë dhe Belgjikë, çështjet e ngritura nga vetë përvojat e specialistëve në Shqipëri si dhe vështirësitë transferenciale të punës në institucionet e shëndetit mendor.

Në ditën e dytë të seminarit Myriam Mitelman, përmes ligjëratës së saj analizoi pikëpamjen lakaniane të transferencës nëpërmjet dy rasteve klinike që vijnë nga tekstet e frojdiane si dhe qëndrimin e mëvonshëm të Lacan në zgjidhjen e këtyre rasteve klinike. Sipas Mitelman, “Frojdi do ta konceptojë transferencën si përfshirje të psikanalistit në psikanalizën e një të analizuari. Në vend të jetë një agjent “i jashtëm”, psikanalisti paraqitet i përfshirë në jetën psikike të analizuarit. Në këtë pikë qëndrimi i Lacan do të jetë i ndryshëm nga ai i mësuesit të tij”.Gjatë këtij seminari u trajtuan edhe raste të veçanta klinike, ku të pranishmit shkëmbyen pikëpamjet dhe idetë mbi trajtimin e rasteve problematike.

Seminaret mbi psikanalizën frojdiane, një bashkëpunim i Bibliotekës Kombëtare dhe Rrethit Lakanian Shqiptar, janë shndërruar në një traditë suksesshme në këtë fushë duke sjellë në Shqipëri emrat më të njohur të psikanalizës evropiane si Myriam Mitelman, Geert Hoornaert, Sergio Caretto, etj., si dhe përvojën e trajtimit profesional të pacientëve, një përvojë e vlefshme që mund të aplikohet edhe në Shqipëri. Psikanaliza, si praktikë e veçantë e lidhur ngushtësisht me fjalën dhe dëgjimin, po përpiqet tashmë prej vitesh të takojë mendimin shqiptar duke sfiduar mbetjet e ngërçet e një mendimi dhe një gjuhe të drunjtë post-totalitare.