Ngjarje

Mes leximit të poezive dhe muzikës së zgjedhur përmbyllet Klubi i Leximit të Letërsisë Austriake

2 shkurt 2019



“Klubi i leximit i letërsisë austriake” mblodhi të shtunën paradite, më datë 2 shkurt, në Sallën Gjermane të Leximit në Bibliotekën Kombëtare të Shqipërisë në një takim përmbyllës mes leximit të poezisë dhe muzikës së zgjedhur poetë, përkthyes, artistë, pedagogë, nxënës, studentë, si dhe të ftuarit e veçantë Ambasadorin e Austrisë në Shqipëri, z. Johann Sattler, aktorin Dritan Boriçi si dhe kantautorin e mirënjohur Kujtim Prodani. Në fjalën e saj përshëndetëse drejtoresha e BKSH-së, Persida Asllani, u shpreh se “ky klub leximi ka qenë një hapësirë ku shkëmbehen afinitete, shijet e mira të leximit, por edhe zbulimi i autorëve të letërsisë interesante austriake. Ky klub solli përgjatë këtij viti kulturën e Austrisë në Shqipëri, duke qenë një vit i kontakteve dhe shkëmbimeve të shumta, tanimë duke ditur më shumë për gjërat që na bashkojnë dhe ato që na dallojnë. Një vit që na ndihmoi në thellimin e njohjes sonë mbi letërsinë austriake”. Edhe Ambasadori i Austrisë në Tiranë, z. Johann Sattler, duke falënderuar për angazhimin dhe punën në realizimin e këtij klubi leximi dhe përvojën unike që ai solli për të gjithë pjesëmarrësit, theksoi “vijimin e bashkëpunimit të ngushtë midis Ambasadës Austriake dhe Bibliotekës Kombëtare”.

Si aktivitet përmbyllës i klubit të leximit, ai erdhi i konceptuar si një takim mes miqsh, që ndajnë së bashku kënaqësinë e leximit të poezisë, në shoqërinë e tingujve të magjishëm të muzikës dhe këngëve të Kujtim Prodanit, anëtarët e klubit dhe të ftuarit. Klubi i leximi të letërsisë austriake u ngrit në kuadër të Vitit Kulturor të Austrisë në Shqipëri, me moton “Të rizbulojmë të përbashkëtat”, ku përmes aktiviteteve të përbashkëta kulturore në mbarë vendin si lexime, ekspozita, konferenca shkencore, koncerteve, etj., synoi të rizbulonte gjërat e përbashkëta në historinë dhe kulturën e dy vendeve. Themelimi i klubit të leximit të letërsisë austriake, një vit më parë iu kushtua përkthyesit të jashtëzakonshëm të gjuhës gjermane, Afrim Koçi. Përgjatë gjithë vitit, të shtunën e fundit të çdo muaji, në Sallën Gjermane të Leximit, në mjediset e Ndërtesë së vjetër të BKSH-së, “Klubi i leximit i letërsisë austriake” trajtoi autorë bashkëkohorë austriakë, përmes një libri të përzgjedhur më parë dhe të dhuruar ose shpërndarë për lexim për të gjithë anëtarët e klubit. Pjesë e diskutimeve dhe leximeve ishin veprat e nobelisten austriake Elfride Jelinek, shkrimtarëve Michael Köhlmeier, Robert Musil, por edhe të ftuarit e veçantë si poeti Erëin Einziger, shkrimtaren Andrea Grill, korrespondenten për Ballkanin e gazetës “Der Standard”, Adelheid Ëölfl, apo shkrimtarët, përkthyesit dhe studiuesit Dhurata Shehri, Arjan Leka, Jonila Gogole, Parid Teferiç, Majlinda Cullhaj, etj.