Ngjarje

Ministrja e Kulturës, Elva Margariti, ndan me fëmijët nismën “Mos e harro librin e pushimeve!”

14 qershor 2019


 

Në Bibliotekën Kombëtare të Shqipërisë, ditën e premte, më datë 14 qershor, Ministrja e Kulturës, znj. Elva Margariti u takua me fëmijët që dhuruan libra për Bibliotekën e Shkollës së Bashkuar të fshatit Kasallë si dhe ndau me ta nismën: “Mos harro librin e pushimeve”. Ajo i falënderoi fëmijët për nismën e bukur dhe solidaritetin me bashkëmoshatarët e tyre. Ministrja e Kulturës, Elva Margariti, së bashku me drejtoreshën Persida Asllani, u lexuan fëmijëve libra nga “biblioteka fëminore”, duke zbuluar botën imagjinare të “Liza në botën e çudirave” si dhe udhëtuan në ‘botën e pemëve’ të krijuar nga shkrimtari francez Jean-Marie Gustav Le Clézio. Takimi me fëmijët e vegjël u shoqërua edhe me një bashkëbisedim miqësor.

Pak ditë më parë, më datë 7 qershor, me iniciativë të një grupi fëmijësh, dhe me mbështetjen e Bibliotekës Kombëtare, u dhuruan rreth 180 libra të cilët do të pasurojnë Bibliotekën e shkollës Kasallë. Në këtë takim drejtoresha e BKSH-së i këshilloi fëmijët e shkollës Kasallë të lexojnë edhe gjatë pushimeve, por pa harruar lojërat në natyrë, duke i ftuar që kur të kthehen në shtator në shkollë ata do t’u tregojnë shokëve për librin që kanë lexuar.

Kënaqësi të shohësh fëmijët të kalojnë kohën e lirë duke lexuar!

Fëmijët e zgjodhën librin e pushimeve! Mos e harroni edhe ju!