Ngjarje

Çelet në Bibliotekën Kombëtare, Pranvera e Frankofonisë në Shqipëri

2 mars 2020


 

Ambasadorja e Francës në Tiranë, znj. Christina Vasak, çeli të hënën, më datë 2 mars, në Sallën Franceze të Leximit në Bibliotekën Kombëtare të Shqipërisë, Muajin e Pranverës Frankofone në Shqipëri 2020, me pjesëmarrjen e Ambasadores së Greqisë në Tiranë, znj. Sophia Philippiddou, drejtorit të Bibliotekës Kombëtare, z. Piro Misha, Drejtori i Aleancës Franceze në Tiranë, Dritan Xhelili, drejtoresha e Arkivit Qendror Shtetëror të Filmit, znj. Iris Elezi, studiues, arkeologë, përkthyes, mësues të gjuhës frënge, gazetarë, etj.

Në fjalën e saj përshëndetëse, Ambasadorja Vasaku shpreh se “ky vit sjell një program tejet të veçantë të Pranverës së Frankofonisë në Shqipëri. Viti 2020 përkon edhe me 50 vjetorin e Organizatës Ndërkombëtare të Frankofonisë, e krijuar me iniciativën e tre kryetarëve të shteteve të Afrikës dhe Azisë. Këtë vit bëhet anëtare për herë të parë edhe Irlanda” duke shtuar se “këtë vit në Tiranë festohet edhe 100 vjetori i themelimit të Tiranës kryeqytet, çka e bën këtë vit edhe më të veçantë”. Ndërkohë, Ambasadorja e Greqisë në Tiranë, znj. Sophia Philippiddou theksoi “pjesëmarrjen e Greqisë në tre aktivitetet të rëndësishme në këtë muaj aktivitetesh të Pranverës Frankofone”.

Rreth 80 aktivitete kulturore do të zhvillohen në 15 qytete të Shqipërisë, duke mbledhur bashkë studiues të fushave të ndryshme, shkrimtarë, mësues, nxënës dhe studentë duke nisur me seminarin arkeologjik ndërkombëtar do të përmbledhë zbulimet e fundit, të cilat konfirmojnë vendin e Ilirisë antike si urë lidhëse mes kulturave të Mesdheut dhe të Evropës për të vijuar me kinemanë frankofone nga Kanadaja, Egjipti, Franca, Irlanda, Republika Çeke, Serbi, etj. Një vend të rëndësishëm gjatë këtij muaji do të zërë muzika, letërsia, sfidat e ekologjisë apo angazhimin e grave në art. Muaji i Frankofonisë është festa e 300 milionë grave dhe burrave, të cilët i bashkon frëngjishtja, vizë lidhëse mes kulturave të ndryshme dhe të pasura, të shtrira në 5 kontinente dhe 88 vende.