Ngjarje
“Bibliotekat dhe kujtesa kombëtare” - edicioni i dytë i Konferencës Kombëtare të Bibliotekonimisë
Në kuadër të Muajit të kulturës Shqipëri-Kosovë dhe në vijim të Marrëveshjes së bashkëpunimit midis tyre, Biblioteka Kombëtare e Shqipërisë dhe Biblioteka Kombëtare dhe Universitare e Kosovës organizuan në Prishtinë, nga data 20-22 nëntor 2007, edicionin e dytë të Konferencës Kombëtare të Bibliotekonimisë me titull “Bibliotekat dhe kujtesa kombëtare”.
Kjo Konferencë, tashmë tradicionale - e përvitshme -, e cila vitin e kaluar është mbajtur në Tiranë, u mbajt nën kujdesin dhe mbështetjen e Ministrisë së Turizmit, Kulturës, Rinisë dhe Sporteve të Shqipërisë si dhe Ministrisë së Arsimit, Shkencës dhe Teknologjisë dhe Ministrisë së Kulturës, Rinisë dhe Sporteve të Kosovës.
Në ceremoninë e çeljes së punimeve të konferencës morën pjesë funksionarë të ministrive përgjegjëse për bibliotekat në të dy vendet, bibliotekarë nga Kosova dhe Shqipëria etj. Fjalën e hapjes e mbajti z. Sali Bashota, drejtor i Bibliotekës Kombëtare dhe Universitare të Kosovës, i cili u uroi mirëseardhjen kolegëve nga Shqipëria. Ai u ndal në punën me mjaft vlerë që kanë bërë dhe bëjnë bibliotekat shqiptare në mbledhjen, përpunimin dhe shërbimin e materialeve bibliotekare si pjesë e rëndësishme e kujtesës kombëtare.
Z. Aurel Plasari, drejtor i Bibliotekës Kombëtare të Shqipërisë, pasi përshëndeti të pranishmit dhe i uroi punë të mbarë konferencës, theksoi rëndësinë e shërbimeve bibliotekare për ruajtjen e trashëgimisë kombëtare të shkruar sidomos në kushtet e zhvillimeve të teknologjive të reja të informacionit.
Në kumtesat e paraqitura në Konferencë nga njohësit më të mirë - me formim kulturor dhe bibliotekar - nga Shqipëria dhe Kosova, u analizuan praktikat, por dhe vizionet e përbashkëta për ruajtjen dhe mirëmbajtjen e trashëgimisë kulturore kombëtare, në përputhje me zhvillimet e reja të teknologjive dhe të shkencës së bibliotekave dhe informacionit.
Gjatë ditëve të Konferencës qëndroi e çelur edhe një ekspozitë, e përgatitur nga specialistët e Bibliotekës Kombëtare të Shqipërisë, në kuadër të Vitit jubilar “Kuteli” për nder të 100-vjetorit të lindjes së shkrimtarit të madh.
 |
 |
 |
 |
Kumtimet e Konferencës Kombëtare të Bibliotekonomisë 20 – 22 nëntor 2007 Bibliotekat digjitale dhe kujtesa kombëtare (Etleva Domi) Arritje dhe mundësi të reja të ndriçimit të fondeve të rralla të Bibliotekës Kombëtare (Mejli Kokona) Bibliotekat e para në Prizren dhe librat e vjetër (Sahadete Sadikaj) Hartat e shek. 16-19, pjesë e kujtesës kombëtare (Afërdita Sharxhi) Konsekuencat e mosdokumentimit në Kosovë, apo kërkimi i të humburës (Fazli Gajraku) Libri shqip i dekadave të para të shtetit shqiptar: dukuri dhe probleme bibliotekonomike sipas bibliografisë retrospektive (Maksim Gjinaj) Letërsia shqiptare e Kosovës 1835-2005: vështrim bibliografik (Tahir Foniqi) Digjitalizimi i skedarëve të koleksioneve të dorëshkrimeve dhe të librave të rrallë të fondeve Al-Ba dhe integrimi i tyre në Web-in e Bibliotekës Kombëtare (Behije Luga, Mirlona Buzo) Biblioteka digjitale në shërbim të kujtesës kombëtare (Ramush Zeka & Besim Kokollari) Krijimi i sistemit të përbashkët të informacionit për vlerat kulturore duke shkuar drejt unifikimit të katalogimit (Marjeta Daci). Përpjekjet dhe strategjia e zhvillimit të katalogut të përbashkët të bibliotekave në Kosovë (Bukurije Haliti) Konvertimi retrospektiv - sfida dhe arritje (Mirela Mersini, Teuta Sula) Trashëgimia kombëtare e shkruar dhe publiku (Ramazan Vozga) Fotografia-dëshmi e kujtesës kombëtare (Jetish Kadishani) Zhvillimi i koleksioneve në bibliotekën publike dhe menaxhimi i tyre (Sylejman Pireva) Koleksionet lokale, pjesë e kulturës kombëtare (Gjovalin Çuni) Ekzemplari i detyrueshëm dhe ruajtja e trashëgimisë kombëtare në Kosovë (Lavdije Rrahmani) Animimi i krijuesve dhe përdoruesve për bibliotekat e muzikës (Edona Munishi-Kokollari) Bibliotekat private, pjesë e trashëgimisë kulturore kombëtare (Violeta Viso) Trinomi bibliotekë, arkiv, muze dhe kultura kombëtare (Farfuri Xhaja, Alda Biçoku) Ruajtja e trashëgimisë kulturore botërore-projekti Kujtesa e Botës (Tefta Buzo)
|